ខេត្តបាត់ដំបង៖ យុវជន៣នាក់បានធ្វើសកម្មភាពឆក់យកកាបូបលុយបានសម្រេចពីនារី វ័យក្មេង៣នាក់ ដែលកំពុងជិះម៉ូតូតាមដងផ្លូវ ប៉ុន្តែ ត្រូវពួកនាងជិះម៉ូតូដេញតាមបុកពីក្រោយបណ្ដាលឱ្យដួលប្រកាច់ ប្រកិនពេញថ្នល់ ។ ហេតុការណ៍នេះ កាលពីល្ងាចថ្ងៃទី៣ មេសា លើកំណាត់ផ្លូវជាតិលេខ៥ ត្រង់ផ្លូវច្រមុះជ្រូក ក្នុងភូមិរំចេក៤ សង្កាត់រតនៈ ក្រុងបាត់ដំបង ហើយត្រូវសមត្ថកិច្ចមកទាន់ក្របួចបានជនដៃដល់២នាក់ និងម្នាក់ទៀតរត់រួចក្នុងស្ថានភាពកំពុងច្របូកច្របល់ ។
មន្ត្រីសមត្ថកិច្ចប្រាប់ថា ជនសង្ស័យទាំង២នាក់នោះ ម្នាក់ឈ្មោះ ខេន ភារម្យ អាយុ២១ឆ្នាំ លក់ខោអាវនៅផ្សារលើ រស់នៅភូមិកំពង់សីមាសង្កាត់វត្តគ ក្រុងបាត់ដំបង និងម្នាក់ទៀតឈ្មោះសុះ ស៊ីហ្វា ហៅ វ៉ា អាយុ១៩ឆ្នាំ នៅរាជធានីភ្នំពេញ តែមកស្នាក់នៅបណ្ដោះអាសន្នជាមួយជនខាងលើ និងជិះម៉ូតូម៉ាកស្គូពី ពណ៌ផ្ទៃមេឃ គ្មានស្លាកលេខ ។ រីឯនារីរងគ្រោះ ១-ឈ្មោះយ៉ុត ឆវី អាយុ២៤ឆ្នាំ ២-ឈ្មោះយ៉ុត ឆវិន អាយុ២១ឆ្នាំ ២នាក់នេះជាបងប្អូនបង្កើត និង៣-ឈ្មោះ គីន អាយុ១៩ឆ្នាំ ទាំងអស់គ្នារស់នៅភូមិសូភី២ សង្កាត់រតនៈ ក្រុងបាត់ដំបង ។ ជិះម៉ូតូម៉ាកឃ្លិក ពណ៌សលាយឈាមជ្រូក ពាក់ស្លាកលេខបាត់ដំបង 1J-7654 ។ សមត្ថកិច្ចនិយាយថា ជនសង្ស័យបានឆក់យកកាបូបនារីខាងលើនេះ ហើយព្យាយាមជិះរត់គេចតែត្រូវពួកនាងជិះដេញតាមបុកពីក្រោយ បណ្ដាលឱ្យដួល ទើបសមត្ថកិច្ចចាប់បាន២នាក់ ឯម្នាក់ទៀតរត់រួច ។ ដោយឡែកនារីទាំង៣នាក់ក៏រងរបួសគួរសមដែរ ។នាងយ៉ុត ឆវី បាននិយាយប្រាប់សមត្ថកិច្ចថា ពួកនាងបានជិះម៉ូតូចេញពីម្ដុំរង្វង់មូលលោកតាដំបងគ្រញូងបម្រុង មកផ្ទះ លុះមកដល់ខាងមុខសាលាខូអ័រ ស្រាប់តែក្រុមជនខាងលើជិះម៉ូតូមកឆាបរួចឆក់យកកាបូបពីដៃនាង ។ គ្រានោះប្អូនស្រីនាងឈ្មោះឆវិន ជាអ្នកបើកម៉ូតូបានបន្ថែមល្បឿនដេញតាមដោយស្រែកថា «ចោរៗ» កងរំពងតាមដងផ្លូវឱ្យគេជួយអន្តរាគមន៍ទៀតផង ។ ប៉ុន្តែបានប្រហែលជា៣០០ម៉ែត្រដល់ចំណុចផ្លូវច្រមុះជ្រូកក៏បុកពី ក្រោយដួលទាំងអស់គ្នា ស្របពេលនោះសមត្ថកិច្ចក៏មកដល់ធ្វើអន្តរាគមន៍ចាប់ក្រុមចោរឆក់បាន២ នាក់ភា្លមៗតែម្ដង។ ពេលជិះម៉ូតូបុកពួកចោរនោះដួលហើយ កាបូបលុយបានធ្លាក់ពីដៃពួកគេ ហើយនាងក៏ស្ទុះទៅដណ្ដើមបានមកវិញដែរ ។ប៉ូលិសត្រូវឃាត់ខ្លួនភ្លាមៗជនសង្ស័យបាន ព្យាយាមឆ្លើយបដិសេធថា ខ្លួនមិនបានឆក់យកកាបូបលុយពីនារីរងគ្រោះខាងលើនេះទេ បើទោះជាកាបូបលុយនោះធ្លាក់ពីដៃពួកគេពេលដួលម៉ូតូក្ដី ។ ប៉ុន្តែសាក្សីជាច្រើនអះអាងថា បានឃើញក្រុមនេះធ្វើសកម្មភាព ហើយនារី៣នាក់បានជិះម៉ូតូដេញតាមក្រោយជាមួយនឹងសម្រែក ថា «ចោរៗ» កងរំពងតាមដងផ្លូវ ។ ក្រោយពីមានសាក្សីជាច្រើនឆ្លើយដាក់បន្ទុកជនសង្ស័យក៏ផ្លាស់ ប្ដូរចម្លើយ ហើយសារភាពអំពីកំហុសរបស់ខ្លួនប្រាប់សមត្ថកិច្ចថា ពួកខ្លួនមានគ្នា៣នាក់ដែលធ្វើសកម្មភាពឆក់យកកាបូបលុយពីនារីរង គ្រោះទាំង៣នាក់នោះមែន ។លោកជេត វណ្ណនី ស្នងការរងនគរបាលខេត្ត មានប្រសាសន៍ដែរថា ជនសង្ស័យពិតជាបានព្យាយាមបដិសេធមែន តែក្រោយមកបានសារភាពទទួលស្គាល់កំហុសរបស់ខ្លួនវិញ ក្រោយពីមានសាក្សីមកចង្អុលបង្ហាញដាក់បន្ទុកទៅលើពួកគេ។ លោកស្នងការរងបញ្ជាក់ថា កម្លាំងជំនាញបានសួរនាំ និងកសាងសំណុំរឿងបញ្ជូនជនសង្ស័យទាំង២នាក់ទៅកាន់សាលាដំបូងខេត្ត និងបន្តស្រាវជ្រាវរកចាប់ខ្លួនជនម្នាក់ទៀតដែលកំពុងរត់គេចខ្លួន ៕
